Qeydiyyat prosesi 5 Aprel 2024 tarixindən başlayacaqdır!

Rəşad Haqverdiyev

Neft - qaz sənayesində SƏTƏMM üzrə 19 ildən artıq beynəlxalq təcrübəyə malik peşəkardır. SƏTƏMM sahəsində vacib sayılan bir çox beynəlxalq sertifikatlara (NEBOSH, IOSH, OSH Academy) malikdir.

Caspian Modular Building LTD (CMB) (Azərbaycan və Gürcüstan), Production Services Network (PSN) (Azərbaycan və Gürcüstan), AMEC Foster Wheeler (Azərbaycan), British Petroleum (BP) (Azərbaycan), Worley Parsons (Azərbaycan və Gürcüstan), Worley (Azərbaycan, Gürcüstan və Türkiyə) kimi beynəlxalq şirkətlərdə müxtəlif rəhbər vəzifələrdə, o cümlədən Worley şirkətinin Mərkəzi Asiya və Şərqi Avropa regionundakı layihələrinin SƏTƏMM üzrə əməliyyatlar direktoru kimi fəaliyyət göstərmişdir.

Hal-hazırda “Azərbaycan Hava Yolları” QSC-nin SƏTƏMM və Keyfiyyətə Nəzarət İdarəsinin rəisi vəzifəsində çalışır.

Nazim M. Məmmədov

PhD Nazim M.Məmmədov-Ekoloq mühəndis, neft - qaz-istehsalat-mədənçilik sənayesində SƏTƏMM üzrə 25 illik təcrübəyə malik mütəxəssisdir. SƏTƏMM sahəsində 40-dan çox sertifikata, onlardan vacib sayılan beynəlxalq sertifikatlara (NEBOSH, IOSH, OSHAcademy, Auditing Management Systems və s.) malikdir.

“Azpetrol LtD” MMC,”SOCAR”,”SOCAR-ASM”MMC,”Nurgun Holding”,”Azərsu” ASC,”Bakı ElektroAvtomat” ASC,” “Veysəloğlu Qrup”,”Daşkəsən Dəmir Filiz”MMC kimi şirkətlərdə müxtəlif rəhbər vəzifələrdə, o cümlədən “Azəriqaz QSC”-nin "Təmiz Qaz" layihəsinin layihə rəhbəri kimi fəaliyyət göstərmişdir.

Hal-hazırda “Azərbaycan Respublikası Dövlət Tibbi-Sosial Ekspertiza və Reabilitasiya Agentliyinin Protez-Ortez İstehsalat və Reabilitasiya Mərkəzi”nin istehsalat üzrə direktor müavini vəzifəsində çalışır. Eyni zamanda, Azərbaycan Dövlət Neft və Sənaye Universitetinin dosentidir. 3 elmi işin və 17 elmi məqalənin müəllifidir.

Zibeydə Əliyeva

Əliyeva Zibeydə neft-qaz sənayesində 6 illik təcrübəyə malikdir. 2018-ci ildə Bakı Mühəndislik Universitetinin ekologiya mühəndisliyi üzrə magistr təhsilini bitirdikdən sonra bp şirkətinin SƏTƏMM şöbəsində işə başlamışdır. Bu müddət ərzində Azərbaycanın neft-qaz ixrac boru kəmərləri stansiyalarında və Səngəçal Terminalında SƏTƏMM məsləhətçisi vəzifəsində çalışmışdır. 2021-2022-ci illərdə bp şirkətində çeviklik üzrə kouç (Agility Coach) kimi fəaliyyət göstərmişdir. Hazırda Səngəçal Terminalında SƏTƏMM məsləhətçisi olaraq vəzifəsini davam etdirir. Əliyeva Zibeydə müxtəlif beynəlxalq sertifikatlara malikdir (NEBOSH, PSM1 - Professional Scrum Master 1, PSPO1 - Professional Product Owner 1, ICAgile Certified Professional in Agile Coaching (ICP-ACC), ICAgile Certified Professional in Agile Team Facilitation (ICP-ATF)).

Vüqar Hacıyev

Tikinti və neft-qaz sənayesində 13 ildən artıq təcrübəyə malik olan Vüqar Hacıyev dayanıqlılıq, dayanıqlı tikinti mühiti, SƏTƏMM və davamlı tikinti üzrə ekspertdir. O, karyerasını tikinti ekosistemində strategiya, səmərəlilik və ekoloji tərəqqi təmin etmək üçün innovativ və məsuliyyətli təcrübələri təşviq etməyə həsr edir.

Vüqar Hacıyev hal-hazırda "PMD Projects" MMC-də Keyfiyyət və SƏTƏMM üzrə rəhbər vəzifəsində çalışmaqdadır.

Nazim Məmmədov

Nazim Məmmədov enerji, enerji səmərəliliyi və iqlim dəyişmələri üzrə 25 ildən çox ölkədaxili və beynəlxalq təcrübəyə malik mütəxəssisdir.

Azərbaycan Dövlət Neft Akademiyası və Yaponiya Dövlət Universitetində Master Proqramlarını bitirmişdir. Yaponiyanın TEPSCO şirkətində, Azərbaycan Respublikası Energetika Nazirliyinin Bərpa Olunan Enerji Mənbələri Dövlət Agentliyində, Dünya Bankında, həmçinin Avropa Yenidənqurma və İnkişaf Bankında müxtəlif vəzifələrdə çalışmışdır.

Hal-hazırda BMT-nin İnkişaf Proqramında enerji səmərəliliyi və ekoloji layihələrin idarə edilməsinə rəhbərlik edir.

Nurlan Bağırov

Nurlan Bağırov neft-qaz və tikinti sektorunun qlobal miqyaslı quru və dəniz layihələrində SƏTƏM idarəçiliyi sahəsində 22 ildən çox təcrübəyə malik peşəkar mütəxəssisdir. Karyerası boyunca “Bos-shelf”, “Gulf Drilling”, “Metroplex”, bp, “KCA Deutag” və H.Əliyev adına Neft Emalı Zavodunda SƏTƏM üzrə müxtəlif rəhbər vəzifələrdə çalışıb. O, risklərin və təhlükəsizliyin idarə olunmasına fəal yanaşması ilə tanınır. Onun iş təcrübəsi neft və qaz quyularının qazılması və istismarı, sənaye və mülki tikinti layihələri, fövqəladə halların idarə edilməsi də daxil olmaqla müxtəlif sənaye sahələrini əhatə edir. SƏTƏM sahəsində beynəlxalq miqyasda tanınan sertifikatları (CMIOSH, CSP, OSHA30, İSO45001, Taproot RCA) onun təhlükəsizlik standartlarının inkişaf etdirilməsinə sadiqliyini vurğulayır.

Nurlan Bağırov regional iqtisadiyyat və idarəetmə üzrə fəlsəfə doktoru (Ph.D.) dərəcəsinə malikdir. Bundan əlavə, o, İngiltərənin “Portsmouth” Universitetində sənayedə sağlamlıq və texniki təhlükəsizliyin idarəolunması üzrə təhsil alıb. Nurlan Bağırov SƏTƏM idarəçiliyi sahəsində üç kitabın müəllifidir. Bu da onun davamlı inkişaf və bilik paylaşımına olan bağlılığını göstərir. Həmçinin COP29 beynəlxalq tədbiri çərçivəsində baş SƏTƏM meneceri kimi uğurla fəaliyyət göstərmişdir.

Züleyxa Rəsulova

Dr. Züleyxa Rəsulova enerji və nəqliyyat sektorunda 20 ildən artıq iş təcrübəsinə malik həkimdir. Onun sənaye təcrübəsi bp Azərbaycan şirkətində “Əsrin müqaviləsi” üçün səhiyyə məsləhətçisi olaraq başlamışdır. O, müxtəlif korporasiyalarda bir sıra işçi sağlamlığı və təhlükəsizliyi proqramlarının yaradılmasına rəhbərlik etmişdir. Azərbaycan Dövlət Tibb Universitetinin tibb dərəcəsinə və “Portsmouth” Universiteti və “Liverpool John Moores” Universitetində işçi sağlamlığı, təhlükəsizlik və risk idarəetməsi üzrə magistr dərəcələrinə sahibdir.

O, Birləşmiş Krallığın IOSH (İşçi Sağlamlığı və Təhlükəsizliyi İnstitutu) məsləhətçi üzvü və Amerika Sənaye Gigiyenistləri Şurasının Sertifikatlaşdırılmış Sənaye Gigiyenisti (CIH) olaraq tanınır. Hal-hazırda Əbu-Dabi Dövlət Neft Şirkətində (ADNOC) “Onshore” əməliyyatlar üzrə ətraf mühit və işçi sağlamlığı meneceri olaraq çalışır.

Nadir Əfəndiyev

Nadir Əfəndiyev 2023-cü ilin mayında GL Group-un afilə şirkəti “Taghiyev Operating Company” MMC-nin baş meneceri vəzifəsinə təyin edilib. Neft və qaz sənayesində 20 illik təcrübəyə malik Nadir Əfəndiyev son 18 ildə bp Azərbaycanda İstehsalat supervayzeri, ofşor əməliyyatları üzrə mühəndis, Əməliyyatlar qrupunun rəhbəri, Layihə əməliyyatları qrupunun rəhbəri və Ofşor montaj meneceri kimi rəhbər vəzifələrdə işləyib. O, Böyük Britaniyada beynəlxalq təcrübə keçib, layihələrin operativ hazırlığında iştirak edib.

Layihələrin idarəedilməsi sahəsində böyük təcrübəyə malik olan Nadir Əfəndiyev bp-nin aktivləri çərçivəsində Şahdəniz Ofşor Qaz Layihəsi və Neft Aktivlərində Qaz Lift Layihələri kimi iri layihələrdə müxtəlif rəhbər vəzifələrdə çalışıb. Son 4 ildə o, bp-nin aktivlərində və Xəzər dənizində ən mürəkkəb platforma olan Mərkəzi Azəri platformasında Əməliyyat montaj meneceri kimi fəaliyyət göstərib. Milliləşməni fəal təşviq edən Nadir Əfəndiyev bp Azərbaycan şirkətinin işə qəbul proseslərinə də rəhbərlik edib. O, təşkilat üçün olduqca dəyərli olan kadr hazırlığı səviyyələrini qoruyub saxlayan təlim və kouçinq sessiyaları təşkil edib. Nadir Əfəndiyev Azərbaycan Dövlət Neft və Sənaye Univeristetində qazma və kəşfiyyat ixtisası üzrə bakalavr təhsili alıb.

Martins Vanags

Martins Vanags hal-hazırda “SIA Sunstar Group” şirkətində biznesin inkişafı üzrə partnyor kimi fəaliyyət göstərir. “SIA Sunstar Group” Latviya mənşəli bir şirkətdir və iş yerlərində təhlükəsizliyin və sağlamlığın idarə edilməsi üzrə ixtisaslaşmışdır.

O, Latviyanın tanınmış şirkətləri olan Sunstar Group, Sanitex Latvija, LATAKKO və Studio Moderna kimi mühüm şirkətlərində aparıcı vəzifələr icra etmişdir. Sənaye və logistika sahələrində geniş təcrübəyə malikdir.

Vilayət Vəliyev

Vilayət Vəliyev 1983 – 2009-cu illərdə Azərbaycan Elmlər Akademiyasının Dərin Neft və Qaz Yataqlarının Problemləri İnstitutunda (DNQYPİ) böyük laborant kimi işə başlayaraq, mühəndis, böyük mühəndis, kiçik elmi işçi, elmi işçi, böyük elmi işçi, aparıcı elmi işçi, baş elmi işçi, sektor müdiri və şöbə müdiri vəzifələrinə yüksəlmişdir. 1994-cü ildə Amerika Birləşmiş Ştatlarının Beynəlxalq Enerji İqtisadçıları Assosiasiyasının (IAEE) üzvü, 2017-ci ildə İdarə Heyətinin üzvü, 2018-ci ildə regional inkişaf məsələləri üzrə vitse-prezidenti seçilmişdir. 2003 – 2011-ci illərdə (2009-cu ildən sonra əvəzçiliklə) AMEA-nın Geologiya İnstitutunda (AMEA-nın DNQYPİ ilə Geologiya İnstitutu birləşdikdən sonra) “Neft-Qaz Problemlərinin İqtisadi Tədqiqi” şöbəsinin müdiri işləmişdir. 2014-cü ildə Azərbaycan Respublikası Prezidentinin Sərəncamı ilə “Azərbaycan Respublikasının Əməkdar elm xadimi” fəxri adına layiq görülmüşdür. ABŞ-nin “PA Consulting” şirkətinin 2001 – 2006-cı illərdə Azərbaycan üzrə ölkə rəhbəri olmuşdur.

2009 – 2019-cu illərdə Azərbaycan Respublikası İqtisadiyyat Nazirliyi İqtisadi İslahatlar Elmi Tədqiqat İnstitutunun direktoru vəzifəsində fəaliyyət göstərmişdir.

90-cı illərin əvvəllərindən başlayaraq özəl və dövlət universitetlərində müəllim kimi fəaliyyət göstərir, 2019-cu ildə prezident İlham Əliyevin sərəncamı ilə Azərbaycan Texniki Universitetinin rektoru təyin edilib. 29 iyul 2024-cü ildən yenidən həmin universitetinin rektoru vəzifəsini icra edir.

Vilayət Vəliyev 112 elmi əsərin, o cümlədən 40-dan artıq xaricdə çap olunmuş əsərin, həmçinin 1 monoqrafiya və 1 dərsliyin müəllifidir. Onun elmi rəhbərliyi ilə 12 elmlər namizədi (fəlsəfə doktoru) hazırlanmışdır.

Adil Əliyev

Müxtəlif enerji layihələrinin icrasında və səmərəli həll yollarının tətbiqində geniş təcrübəyə malik mütəxəssisdir.

Azərbaycan Dövlət Neft Akademiyasının bakalavr və Xəzər Universitetinin magistr proqramlarını bitirmişdir. 2019-cu ildən etibarən ”Azərenerji” ASC-də müxtəlif vəzifələri icra etmişdir.

Hazırda ”Azərenerji” ASC-nin prezidentinin strateji layihələr üzrə müşaviri vəzifəsində çalışır.

Murad Sadıxov

Murad Sadıxov Bakı Dövlət Universitetinin Fizika fakültəsini bitirib. Koç Universitetində isə biznesin idarə edilməsi üzrə magistr dərəcəsini alıb. 2021-ci ildən Birləşmiş Ərəb Əmirliklərinin bərpa olunan enerji sahəsində dünyada aparıcı şirkəti olan “Masdar”ın Azərbaycanda ölkə nümayəndəliyinin rəhbəridir və şirkətin Azərbaycandakı təmiz enerji layihələrinə, o cümlədən xidmətlərinə dəstək verir.

O, qazandığı təcrübələrə əsaslanaraq, qlobal enerji keçidini və Azərbaycanda hazırkı dayanıqlı iqtisadi inkişafın dəstəklənməsini təmin edir. Murad Sadıxov “Aramco”da biznesin inkişafı üzrə menecer, bp-də yerüstü əməliyyatlar üzrə maliyyə müşaviri, “Norm Sement”in layihə rəhbəri və baş strategiya direktoru, həmçinin “Nobel Oil Azerbaijan”ın baş meneceri kimi fəaliyyət göstərib.

Elmar Qasımov

Elmar Qasımov 1999 – 2011-ci illərdə Azərbaycan Respublikası təhsil nazirinin müavini vəzifəsində çalışıb. 2011 – 2012-ci illərdə Azərbaycan Respublikası Dövlət Neft Şirkətinin vitse-prezidentinin müavini vəzifəsini icra edib.

O, 10 aprel 2012-ci ildə Azərbaycan Respublikasının Prezidenti İlham Əliyevin Sərəncamı ilə Bakı Ali Neft Məktəbinin rektoru təyin edilib. Elmar Qasımov 2008-ci ildə “Tərəqqi” medalı, 2022-ci ildə “III dərəcəli Vətənə xidmətə görə” ordeni ilə təltif edilib.

O, Bakı Dövlət Universitetinin Coğrafiya və hüquq fakültəsini fərqlənmə diplomu ilə bitirib.

Nigar Arpadarai

Coming soon...

Ələsgər Həsənov

Ələsgər Həsənov Azərbaycan Dövlət Neft Akademiyası (1991 – 1996) və Naxçıvan Dövlət Universitetini (2006 – 2010) bitirib. 2002 – 2006-cı illərdə Azərbaycan Respublikası Standartlaşdırma, Metrologiya və Patent üzrə Dövlət Agentliyində müxtəlif vəzifələrdə çalışıb.

2006 – 2014-cü illərdə Azərbaycan Respublikası Sənaye və Energetika Nazirliyində baş məsləhətçi, şöbə müdirinin müavini, 2014-cü ildən Azərbaycan Respublikası Energetika Nazirliyində şöbə müdirinin müavini, şöbə müdiri kimi fəaliyyət göstərib. 13 yanvar 2023-cü il tarixindən Azərbaycan Respublikası Energetika Nazirliyində Elektrik və istilik enerjisi şöbəsinin müdiridir.

Vüqar Kərimov

Vüqar Kərimov 1995-ci ildə Gəncə Dövlət Universitetini biologiya və kimya ixtisası üzrə, 2014-cü ildə Azərbaycan Respublikasının Prezidenti yanında Dövlət İdarəçilik Akademiyasını dövlət və bələdiyyə idarəetməsi ixtisası üzrə bitirmişdir. O, 1995 – 1998-ci illərdə AMEA-nın Botanika İnstitutunun aspiranturasında təhsil almış, 1998 – 2008-ci illərdə həmin İnstitutda elmi işçi, aparıcı elmi işçi, böyük elmi işçi, laboratoriya və şöbə müdiri vəzifələrində çalışmışdır.

🔹 Vüqar Kərimov 2008-ci ildən 2010-cu ilədək SOCAR-ın Ekologiya İdarəsinin Yaşıllaşdırma departamentinin rəis müavini və rəisi vəzifələrində işləmiş, 2010-cu ildə Ekologiya İdarəsinin rəis müavini vəzifəsinə təyin edilmişdir. O, 2012-ci ildən 2018-ci ilədək SOCAR-ın “Azərikimya” İstehsalat Birliyinin icraçı direktorunun müavini vəzifəsində çalışmışdır. Həmçinin 2018-ci ilin 11 iyun tarixindən Azərbaycan Respublikası Ekologiya və Təbii Sərvətlər Nazirliyinin Aparat rəhbəri vəzifəsində çalışmış, 14 aprel 2020-ci il tarixindən nazir müavini vəzifəsinə təyin olunmuşdur.

🔹 Vüqar Kərimov Azərbaycan Respublikası Ali Attestasiya Komissiyasının 2001-ci il 19 yanvar tarixli Qərarı ilə biologiya elmləri namizədi alimlik dərəcəsi, 2017-ci il 16 mart tarixli Qərarı ilə botanika ixtisası üzrə dosent elmi adı verilmişdir. 65 elmi əsərin, o cümlədən 3 kitabın müəllifi, Azərbaycan Respublikasının “Qırmızı kitabı”nın II və III nəşrinin həmmüəlliflərindən biridir.

🔹 19 sentyabr 2016-cı ildə Azərbaycan Respublikası Prezidentinin Sərəncamı ilə “Tərəqqi” medalı ilə təltif olunmuşdur.

Cavid Abdullayev

Cavid Abdullayev 1997-2011-ci illərdə Bakı Dövlət Universitetində müxtəlif vəzifələrdə çalışmış, 2001-2003-cü illərdə Amerika Hüquqşünaslar Assosiyasının (ABA/CEELİ) maliyyə dəstəyi ilə yaradılan Hüquq klinikasında bölmə rəhbəri olmuşdur.

2018-2019-cu illərdə Energetika Nazirliyinin Strateji proqramlar və layihələr şöbəsinin müdir müavini, 2019-2022-ci illərdə energetika nazirinin müşaviri olmuşdur.

2022-ci il tarixindən Energetika Nazirliyi yanında Bərpa Olunan Enerji Mənbələri Dövlət Agentliyinin direktorudur.

İsmayıl Nəsirov

İsmayıl Nəsirov Bakı Dövlət Universitetinin Beynəlxalq hüquq fakültəsinin məzunudur. O, İstanbul Universitetinin İdarəetmə fakültəsi üzrə magistr təhsili almışdır.

Birləşmiş Millətlər Təşkilatının İqtisadi Komissiyasının “Sənaye qəzalarının transsərhəd təsiri haqqında” Konvensiyasının Azərbaycan Respublikası üzrə milli əlaqələndiricisidir.

İsmayıl Nəsirov hal-hazırda Fövqəladə Hallar Nazirliyi Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyində rəis müavini vəzifəsində çalışır.